I'a des gins comme cha...

I'a des gins comme cha, l'preumire fôs qu'te les vos, te sais tout d'sute qu'is ont ène séquô d'puque. Mi, tchand qu'j'ai rincontré Françoise "Courotte", comme qu'in l'app'lot adon, ch'étot acore du temps édoù qu'i avot in atelier patois amon Ecovie. In s' èrtreuvot, à ène paire, dins ène pétite majon in face d'hospice des vieux à Leers (achteure, in n'peut pus dire cha, in dot dire "le home" ou bin "l'majon d'èrtraite" !). Quô qu'in avot comme plaiji à babiller insonne dins not'beau parlache ! I'avot nin si lommint que j'm'y étos r'mis, foque pou raconter les bleusses qu'min grand-père i m'dijot tchand qu'j'étos garchonal. Pou Françoise, cheul'lanque, ch'étot bin puque qu'ène viès' rie du temps passé. Ch'étot d'abord l'parlache des gins d'ichi, des vrais gins, nin des faijeux d'ménoules !
I'a des gins comme cha ! Fallot vir comme qu'elle préparot bin nos "exercices", toudis dins l'bonne humeur, mais sins laisser monter su's' gampe. Adon, quô qu'in faijot comme progrès. Combin d'affaires qu'j'ai appris avec elle...
Après,  j'l'ai èrtreuvée dins d's' autes combats, toudis à moutrer qu'i n'faut nin s' laichi faire par les faijeux d'imbarras. Françoise, elle n'avot nin s' lanque dins s' poche tchand qu'elle étot seure d'ête dins sin bon drôt. I'a des gins comme cha.
In a tertous des momints difficiles, mais j'buzie qu'elle, elle a eu puque que s' part ! Bin seûr, i'avot des jours édoù que l'vie v'not bin durte,... Mais adon, ch'est s' n'homme et ses afants qui li servot.tent d'èrmètes. I'a des gins comme cha...
I n'a nin lommint qu'elle est partie édoù qui n'a pus personne qui a de'l'misère... Mais, j'peux l'dire à tertous,... elle manque d'jà tell'mint... pasque, des gins comme cha,... i n'd'a pos grammint !!!

Pierre NOEL.